വോട്ടർ പട്ടിക ക്രമക്കേട് സംബന്ധിച്ച വിവാദങ്ങൾക്കിടെ കേന്ദ്രമന്ത്രി സുരേഷ് ഗോപി ഇന്ന് തൃശൂരിൽ എത്തും. തിരുവനന്തപുരത്ത് വിമാനമിറങ്ങുന്ന സുരേഷ് ഗോപി രാവിലെ ഒൻപതരയോടെ വന്ദേഭാരത് ട്രെയിനിലാകും തൃശൂരിലെത്തുക. റെയിൽവേ സ്റ്റേഷനിൽ സുരേഷ് ഗോപിക്ക് ബിജെപി സ്വീകരണം നൽകും. ഇന്ന് പൊലീസ് കമ്മിഷണൽ ഓഫിസിലേക്ക് ബിജെപി മാർച്ച് സംഘടിപ്പിച്ചിട്ടുണ്ട്.
വോട്ടർപട്ടിക വിവാദത്തിലും കന്യാസ്ത്രീകളുടെ അറസ്റ്റ് വിഷയത്തിലും സുരേഷ് ഗോപിക്കെതിരെ വലിയ പ്രതിഷേധമാണ് യുഡിഎഫും എൽഡിഎഫും ഉയർത്തുന്നത്. വിഷയത്തിൽ ഇതുവരെ അദ്ദേഹം പ്രതികരിച്ചിട്ടില്ല. ഡൽഹിയിൽ ഇന്നലെയും മാധ്യമപ്രവർത്തകർ സുരേഷ് ഗോപിയോട് പ്രതികരണം ആരാഞ്ഞെങ്കിലും ഒന്നും മിണ്ടാതെ വാഹനത്തിൽ കയറുകയായിരുന്നു.
ഇതോടെ ആരോപണങ്ങൾ സംബന്ധിച്ച് സുരേഷ് ഗോപി തൃശൂരിൽ പ്രതികരിക്കുമോയെന്നാണ് രാഷ്ട്രീയ കേന്ദ്രങ്ങളിലെ ആകാംക്ഷ.
